एआई क्यामेराले कुन अपराधहरू पक्रिन सक्छ?
• गाडी चलाउँदा फोन प्रयोग गर्ने – £200 जरिवाना र ६ पेनाल्टी अंक
• सिटबेल्ट नलगाउने – अधिकतम जरिवाना £500
• रातो बत्तीमा नरोकिने – £100 जरिवाना र ३ पेनाल्टी अंक
• मान्य एमओटी बिना गाडी चलाउने – अधिकतम जरिवाना £1,000
• बिमा बिना गाडी चलाउने – £300 जरिवाना र ६ पेनाल्टी अंक
लण्डन – बेलायतको ग्रेटर म्यानचेस्टर क्षेत्रमा भोलिदेखि नयाँ एआई क्यामेरा प्रयोगमा आउँदैछन्, जसले गाडी चलाउँदै फोन चलाउने चालकलाई कानुनी कारवाहीको लागि सिधै समात्नेछ। यो क्यामेरा प्रणाली राष्ट्रिय सडक सुरक्षालाई सुनिश्चित गर्न व्यापक राष्ट्रिय परीक्षणको भागको रूपमा तैनाथ गरिँदैछ।
स्मार्टफोन चलाएर गाडी हाँक्दा अब ६ अंकको दण्ड र £१,००० जरिवाना हुने सम्भावना छ। यस्तै, सीटबेल्ट नलगाएका व्यक्तिहरूलाई पनि यी क्यामेराले पहिचान गर्न सक्नेछन्, जुन दुर्घटनाको मुख्य कारण मानिन्छ।
ट्रान्सपोर्ट फर ग्रेटर म्यानचेस्टरले एआई क्यामेरा सिस्टम ‘हेड्स अप’ लाई परिचालन गर्नेछ, जसलाई प्रविधि कम्पनी अकुसेन्ससले निर्माण गरेको हो। यसले चालकहरूलाई मोबाइल फोन चलाउँदा स्वचालित रूपमा पहिचान गरी कानुन कार्यान्वयनका लागि प्रमाण उपलब्ध गराउनेछ।
यो प्रविधि २०२१ मा नेशनल हाईवेजद्वारा पहिलो पटक परीक्षण गरिएको थियो। क्यामेराले प्रति घण्टा ३०० किलोमिटरसम्मको गतिमा चलिरहेका सवारीसाधनहरूको फुटेज संकलन गर्दछ र त्यसलाई एआई मार्फत चलानी गरी चालक फोनमा व्यस्त भए वा सीटबेल्ट नलगाए जाँचिन्छ।
योजना अनुसार, यो प्रणाली मार्च २०२५ सम्म विभिन्न स्थानहरूमा परीक्षण गरिनेछ। यसमा ग्रेटर म्यानचेस्टर, डरहम, हम्बरसाइड, स्टाफोर्डशायर, वेस्ट मर्सिया, नर्थह्याम्पटनशायर, विल्टशायर, नर्फोक, थेम्स भ्याली पुलिस र ससेक्स क्षेत्रहरूमा तैनाथ हुनेछ। भविष्यमा, यी एआई क्यामेरा मोटरवेमा पनि तैनाथ गरिने छन्।